Feeds:
Posts
ಟಿಪ್ಪಣಿಗಳು

Archive for ಆಗಷ್ಟ್, 2009

೧. ಜಗತ್ತೆಲ್ಲಾ ಸುತ್ತಬೇಕೆಂದುಕೊಂಡ ಬುದ್ದಿವಂತ ಆಗಸಕ್ಕೆಬಳ್ಳಿ ಕಟ್ಟಿ ನೇತಾಡಿದನಂತೆ. ಹೇಗೂ ಭೂಮಿ ತಿರುಗುತ್ತದಲ್ಲ.

೨. ಜೀವನವೆಂದರೆ ಜೀ-ವನ (ಮನಸಿನ ಕಾಡು ,ಜೀ ಅಂದರೆ ಮನಸು ಎಂದರ್ಥ ಹಿಂದಿಯಲ್ಲಿ) ವೋ, ಅಲ್ಲ ಜೀವ-ನ(ಜೀವವಿಲ್ಲದಿರುವುದು)ವೋ?

೩. ಊರಲ್ಲಿರುವ ಮಕ್ಕಳೆಲ್ಲರ ಜಾತಕ ಬರೆದ ಜ್ಯೋತಿಷಿ ತನ್ನ ಮಗನ ಜಾತಕ ಬರೆಸಲು ಪಕ್ಕದೂರಿಗೆ ಹೊರಟನಂತೆ.

೪. ಬೆಳ್ಳಗಿರುವುದೆಲ್ಲಾ ಹಾಲಲ್ಲ. ಕೆಲವೊಮ್ಮೆ ಮಜ್ಜಿಗೆಯೋ, ಸುಣ್ಣದ ನೀರೋ ಆಗಿರಬಹುದು.

೫. ಸಮಾಜಕ್ಕೆ, ದೇಶಕ್ಕೆ, ಜಾತಿಗೆ ಹೆದರದವನು ಚಿಕ್ಕ ಮನಸಿಗೆ ಹೆದರಿದನಂತೆ.

೬. ದಣಿದು ಬಂದ ಗಂಡನಿಗೆ, ಹೆಂಡತಿಯ ಸಿಡುಕಿನ ಬೈಗುಳ ಕೇಳಿದಾಗ ಮದುವೆಗೆ ಸಾಕ್ಷಿಯಾದ ಅಗ್ನಿಯ ನೆನಪಾಯಿತು.

೭. ರಾತ್ರಿ ನಿದ್ದೆ ಬರದೆ ಹಗಲಲ್ಲಿ ಮಲಗಿದಾಗ ಕಾಣುವುದೇ ಹಗಲುಕನಸು?

೮. ಅಕ್ಷರಕ್ರಾಂತಿ, ಧವಳಕ್ರಾಂತಿ, ಆಹಾರಕ್ರಾಂತಿ ಮಾಡ ಹೊರಟವನಿಗೆ ಮನೆಯಲ್ಲಿನ ತನ್ನೊಡತಿಯ ಕ್ರಾಂತಿಗೆ ಉತ್ತರ ಸಿಗಲಿಲ್ಲವಂತೆ.

೯. ಬದುಕೊಂದು ಸಿನೆಮಾದಂತೆ ನಿನಗೆ ನೀನೇ ನಾಯಕ. ಉಳಿದವರೆಲ್ಲರು ಖಳನಾಯಕರು, ಪೋಷಕನಟರು.

೧೦. ಇಷ್ಟವಿಲ್ಲದೇ ಬಲವಂತಕೆ ಮದುವೆಯಾಗುವವನಿಗೆ ಹೂಮಾಲೆ ಯಮನ ಶೂಲದಂತೆಯೂ, ಮೃಷ್ಟಾನ್ನದೂಟ ತಿಥಿಯೂಟದಂತೆಯೂ ತೋರಿತು.

Advertisements

Read Full Post »

ಮಾತು

ನೆನಪಿನ ದೋಣಿಯಲಿ
ಕೈ ಜಾರಿದ ಕನಸುಗಳು
ಬತ್ತಿದ ನದಿಗೆ
ಸಾಕ್ಷಿಗಳಾದವು ||೧||

            ಮನಸಿನಳುವುದು
            ಜಗದಲಿ ನಗುವುದು
            ನನ್ನ ಎದೆಗೆ
            ದಿನಚರಿಗಳಾದವು ||೨||

ಸತ್ಯವಿಲ್ಲದ ಜಗದಲಿ
ಮಿಥ್ಯವಿನಿಸಿಕೊಳ್ಳಲು
ಮನಸ್ಸಿನ ಬದಿ
ಹಾತೊರೆಯತೊಡಗಿತು ||೩||

Read Full Post »

ಕನಸು

ನಿನ್ನ ನೆನಪಾಗುತಿದೆ
ಮತ್ತೆ ಮತ್ತೆ
ಮಧ್ಯ ದಾರಿಯಲಿ ನೀರಡಿಕೆಯೋ
ಅಲ್ಲ ಪರೀಕ್ಷೆಯೋ
ನಾನರಿಯೆ  ||೧||

ಬಯಸಿದ್ದೆಲ್ಲಾ ಸಿಗುವುದೋ
ಸಿಕ್ಕಿದ್ದೆಲ್ಲಾ ಬಯಸಿದ್ದೋ
ಅಲ್ಲ ಬಯಸಿ
ಸಿಗುವುದೋ
ನಾನರಿಯೆ  ||೨||


ನನ್ನೆದೆಯ ಗೂಡಲ್ಲಿ
ಬತ್ತಿದ ಕಾರಂಜಿಯೋ
ಅಲ್ಲ ಚಿಗುರಿದ
ಕನಸೋ
ನಾನರಿಯೆ ||೩||


ಇಷ್ಟದ ಮನಸ್ಸನ್ನು
ಇಷ್ಟವಿಲ್ಲವೆಂದೋ
ಅಲ್ಲ ಇಷ್ಟವಿಲ್ಲದೆ
ಇಷ್ಟವೆಂದೋ
ನಾನರಿಯೆ ||೪||


ಯಾಂತ್ರಿಕ ಜಗದಲಿ
ಇದು ಪಾಠವೋ
ಅಲ್ಲ ಕೊನೆಯ
ನೇಣುಗಂಬವೋ
ನಾನರಿಯೆ ||೫||


ಆದದ್ದು ಒಳ್ಳೆದಕ್ಕೋ
ಆಗುವುದು ಒಳ್ಳೆದಕ್ಕೋ
ಅಲ್ಲ ಆಗದಿರುವುದು
ಒಳ್ಳೆದಕ್ಕೋ
ನಾನರಿಯೆ ||೬||

Read Full Post »